Buharestde «Dinamo» futbol klubunyň täze stadionyna ýakynda aradan çykan tälimçi Mirça Luçeskunyň adyny dakmak meýilleşdirilýär. Bu barada Rumyniýanyň içeri işler ministri Ketelin Predoýu habar berdi diýip, «Mediafax» neşiri ýazýar.
Sport desgasy köne stadionyň ýerinde gurlar we ol «Dinamo Mirça Luçesku» diýlip atlandyrylar. Gurluşyk işleri birnäçe ýyla çeker.
Mirça Luçesku 7-nji aprelde, 81 ýaşynda infarkt zerarly aradan çykdy. Mart aýynyň ahyrynda Rumyniýanyň milli ýygyndysynyň türgenleşigi wagtynda onuň saglygy ýaramazlaşyp, hassahana ýerleşdirilipdi. Ilki bilen ýagdaýy durnuklaşdyrylan hem bolsa, soňra kynçylyklar ýüze çykdy.
Soňky ýyllarda hünärmen Rumyniýanyň milli ýygyndysyna ýolbaşçylyk edipdi. 2024-nji ýyldan bäri topar onuň ýolbaşçylygynda 18 oýun geçirip, 11 ýeňiş gazandy, bir gezek deňme-deň oýnady we alty gezek ýeňildi.
Mirça Luçesku futbol taryhynda iň köp baýrak gazanan tälimçileriň biridir. Ol gazanan titullarynyň sany boýunça diňe ser Aleks Fergýusondan we Pep Gwardioladan yza galýar. Ol iň uly üstünliklerine Doneskiň «Şahtýory» bilen ýetip, hususan-da, 2009-njy ýylda UEFA-nyň Kubogyny gazanypdy.
