Türkmen wekiliýeti Koreýa Respublikasyna amala aşyran saparynyň çäklerinde 10-njy aprelde Seulda geçirilen «Merkezi Aziýa — Koreýa Respublikasy» hyzmatdaşlyk forumynyň ýokary wezipeli wekilleriniň maslahatyna gatnaşdy. Bu barada Türkmenistanyň DIM-i habar berýär.
Daşary işler ministriniň orunbasary Ahmet Gurbanow Koreýa Respublikasynyň daşary işler ministriniň orunbasary Ýi-He Sesiliýa Çangyň başlyklyk etmeginde geçirilen mejlise gatnaşdy. Gatnaşyjylar «Merkezi Aziýa — Koreýa Respublikasy» birinji sammitine görülýän taýýarlyk meselelerini maslahatlaşdy.
Gurbanow duşuşykda çykyş edip, Türkmenistanyň bu foruma ýurtlaryň arasyndaky hyzmatdaşlygy ösdürmek üçin netijeli meýdança hökmünde garaýandygyny belledi. Şeýle hem ol türkmen tarapynyň Seulda sammit geçirmek baradaky başlangyjy ilkinjileriň biri bolup goldandygyny nygtady.
Öňümizdäki sammitiň Merkezi Aziýa ýurtlary bilen Koreýa Respublikasynyň arasyndaky gepleşikleri ösdürmekde möhüm tapgyr bolmalydygy, şeýle hem diplomatik, söwda-ykdysady, maýa goýum we ynsanperwer ugurlarda hyzmatdaşlygy giňeltmäge ýardam etmelidigi bellenildi.
Taraplar jemleýji resminamalaryň taslamalaryny, şeýle hem sammite taýýarlyk görmegiň guramaçylyk meselelerini ara alyp maslahatlaşdy.
Şol gün Ahmet Gurbanow Merkezi Aziýa ýurtlarynyň daşary işler ministrleriniň orunbasarlarynyň Koreýa Respublikasynyň daşary işler ministri Ço Hýon bilen geçiren duşuşygyna hem gatnaşdy.
Duşuşygyň başynda türkmen tarapy mähirli kabul edilendigi we gepleşikleriň ýokary derejede guralandygy üçin minnetdarlyk bildirdi. Taraplar ikitaraplaýyn we köptaraplaýyn hyzmatdaşlygyň meselelerini maslahatlaşdy.
Söhbetdeşler öňümizdäki sammitiň hyzmatdaşlygy mundan beýläk-de ösdürmäge we amaly gatnaşyklary giňeltmäge ýardam berjekdigine ynam bildirdi. Türkmen tarapy sammitiň taýýarlyk işlerine we geçirilişine işjeň gatnaşmaga taýýardygyny tassyklady.
