Huawei täze flagman smartfonlar seriýasy bolan Pura 90-yň çykaryljakdygyny habar berdi. Bu seriýa Pura 90 Pro we Pura 90 Pro Max modelleri girer. Olar 20-nji aprelde Hytaýda tanyşdyrylar. Kompaniýa bu gezek "Ultra" wersiýasyny çykarmazlyk kararyna geldi.
Iki model hem Pura 80 seriýasyna meňzeş, ýöne käbir üýtgeşmeler girizildi. Gapdal gyralary göni bolup, ekranyň daşyndaky ramkalar has inçeldi. Esasy tapawudy — yzky paneliniň açyk gradient reňkleridir. Insaýderleriň maglumatyna görä, bu dizaýn Huawei P20 Pro modelini ýatladýar.
Smartfonlar aşakdaky ýat we operatiw ýat (RAM) görnüşlerinde elýeterli bolar: 12/256 GB, 12/512 GB, 16/512 GB we 16 GB / 1 TB.
Reňk görnüşleri:
- Huawei Pura 90 Pro: Mulberry Black (gara), Coconut White (ak), Orange Soda (narynç), Pink Guava (gyrmyzy);
- Huawei Pura 90 Pro Max: Obsidian Black (gara), Dawn Gold (altynsöw), Purple Sunset (benewşe), Orange Ocean (narynç), Emerald Lake (zümerret ýaşyl).
Kameralar ulgamynda esasy modul, ultra giň burçly linza we suratlary işlemek hem-de zoom funksiýasy üçin jogap berýän XMAGE ulgamly periskopik tele-obýektiw bar.
Gurluşlaryň Kirin 9030 Pro 9 ýadroly prosessory bilen üpjün edilmegine, HarmonyOS 6 operasion ulgamynda işlemegine hem-de ýady we fon proseslerini dolandyrmak üçin HyperSpace Memory tehnologiýasyny goldamagyna garaşylýar.
Iki model hem eýýäm Hytaýda deslapky sargyt üçin açyk, emma bahalary entek aýan edilmedi. Global bazara çykaryljak wagty barada häzirlikçe maglumat ýok.
