Şweýsariýaly inženerler we alymlar ýarym awtonom dört aýakly ANYmal robotyny üstünlikli synagdan geçirdiler. Ol Ýerden gelýän buýruklar bolmazdan geologik obýektleri özbaşdak öwrenmäge ukyplydyr diýip, “Frontiers in Space Technologies” žurnaly habar berýär.
Bu işläp düzme Marsy öwrenende hünärmenleri rowerleriň her ädimini öňünden meýilleşdirmäge mejbur edýän 4 minutdan 22 minuta çenli dowam edýän aragatnaşygyň gijikme meselesini çözmek üçin niýetlenendir.
Daşyndan robot ite meňzeýän ANYmal roboty mikroskopiki skaner we göterilýän spektrometrli manipulýator bilen enjamlaşdyrylan.
Bazel uniwersitetiniň Mars şertlerini simulýasiýa edýän Marslabor desgasynda geçirilen tejribeleriň dowamynda enjam ýokary öndürijilik görkezdi. Ol nyşanalary özbaşdak saýlady, olaryň ýanyna bardy we seljerme geçirdi.
ANYmal gips, karbonatlar we bazaltlar ýaly esasy ylmy dag jynslaryny üstünlikli kesgitledi we möhüm bolmadyk obýektlere ähmiýet bermedi. Awtonom algoritmleriň ulanylmagy tapşyrygyň ýerine ýetiriliş wagtyny tas iki esse diýen ýaly azaltmaga mümkinçilik berdi. Adam tarapyndan dolandyrylýan adaty robota munuň üçin 40 minutdan gowrak wagt gerek bolýan bolsa, ANYmal tapşyrygy 12–23 minutda ýerine ýetirdi.
