Hytaýyň 42-nji Antarktika ekspedisiýasy gyzgyn suw bilen burawlaýyş ulgamyny üstünlikli synagdan geçirdi we rekord 3413 metr çuňluga ýetdi diýip, Hytaýyň Tebigy gorlar ministrligine salgylanýan Sinhua habar agentligi habar berýär. Bu görkeziji öňki 2540 metrlik dünýä rekordyndan ep-esli köp.
Işler Antarktidanyň gündogaryndaky buzlukasty Silin kölüniň sebitinde geçirildi. Toparyň ýolbaşçysy Go Szinsýueniň belleýşi ýaly, köl 3 kilometrden gowrak galyňlykdaky buz gatlagynyň astynda gizlenýär.
Gyzgyn suw bilen burawlaýyş tehnologiýasy himiki maddalary ulanmazdan, ýokary basyşly suw çüwdürimi arkaly buzy eredip, kölüň gadymy ekoulgamynyň hapalanmagyny aradan aýyrýar.
Szilin uniwersitetiniň professory Çžan Nanyň aýtmagyna görä, synagyň esasy maksady ulgamyň işleýşini görkezmek bolup, ol mundan beýläk gözegçilik etmek hem-de suwuň we çökündileriň nusgalaryny ýygnamak üçin tehniki goldawy üpjün eder.
Synaglaryň üstünligi Hytaýyň indi Antarktika buz örtüginiň 90%-inde we Arktikanyň ähli ýerinde burawlamak üçin tehnologiýa eýedigini aňladýar.
Bilermenler şeýle kölleri öwrenmekligiň gadymy howa üýtgeşmelerini we planetadaky ýaşaýşyň çäklerini öwrenmäge mümkinçilik berýändigini nygtaýarlar.
