7-nji aprelde Buharestde meşhur rumyn futbol tälimçisi Mirça Luçesku 80 ýaşynda dünýäden ötdi. Bu barada Antena 3 CNN telekanaly habar berdi.
Meşhur hünärmen mart aýynyň ahyrynda ýerleşdirilen hassahanada aradan çykdy.
Luçesku 29-njy martda Rumyniýanyň milli ýygyndysynyň türgenleşiginde özünden gidenden soň, hassahana äkidilipdi. Iki günden soň bolsa, ol milli ýygyndynyň baş tälimçisi wezipesinden çekildi. Ony 3-nji aprelde hassahanadan çykarmak meýilleşdirilýärdi, emma şol gün tälimçiniň yzly-yzyna iki gezek infarkt geçirmegi onuň ýagdaýyny has-da agraltdy.
Mirça Luçesku dünýä futbolynyň taryhynda öçmejek yz galdyran tälimçidir.
Ol köp ýyllaryň dowamynda Buharestiň «Dinamo» toparynda we Rumyniýanyň milli ýygyndysynda çykyş etdi.
Tälimçilik karýerasynda ilkinji ädimi 1981-nji ýylda öz ýurdunyň milli ýygyndysyna ýolbaşçylyk etmek bilen başlady.
Luçesku iň uly üstünliklerine klub tälimçisi hökmünde ýetdi. Onuň ýolbaşçylygynda Doneskiň «Şahtýor» topary (2004–2016) sekiz gezek Ukrainanyň çempiony boldy we 2008/2009 möwsüminde UEFA kubogyny gazandy. Şeýle-de ol dürli ýyllarda Italiýanyň «Inter», Türkiýäniň «Galatasaraý» we «Beşiktaş», Sankt-Peterburgyň «Zenit» hem-de Kiýewiň «Dinamo» toparlaryna tälim berdi.
Mirça Luçesku özüniň dowamly karýerasy bilen futbol taryhynda iň köp kubok gazanan tälimçileriň biri hökmünde ýatda galar.
