Tanymal aktrisa Margo Robbi Kaýli Minouguň «Come Into My World» («Meniň dünýäme gel») atly şekilli aýdymyndan ylhamlanyp taýýarlanan Chanel mahabat kampaniýasyna gatnaşdy. Režissýor Mişel Gondri Chanel 25 torbalar toplumyny mahabatlandyrmak üçin meşhur klipi esas edindi.
Wideoda Robbi dürli keşplerde Parižiň köçelerine aýlanyp, aýdymdaky hereketleri gaýtalaýar. Mahabatda Kaýli Minouguň özüniň hem gysga wagtlyk çykyş edýän ýeri bar.
Robbi Vogue žurnalyna beren interwýusynda şekilli aýdyma çagalyk ýyllarynda tomaşa edendigini we ondaky pursatlaryň döredilişiniň täsindigine haýran galandygyny aýtdy. Onuň aýtmagyna görä, mahabat kampaniýasynyň maksady, klipdäki özboluşly tärleri gaýtadan dikeltmek bolup durýar.
Galyberse-de, bu işiň Gondriniň Chanel bilen ilkinji taslamasy däldigini-de bellemek gerek. Režissýor mundan ozal A$AP Rocky we Margaret Kuolli bilen hem mahabat wideolaryny düşüripdi.
Mundan başga-da, dekabr aýynda Chanel brendi BTS toparynyň agzasy Çongugy özüniň täze ilçisi diýip yglan etdi. Aýdymçy bu hyzmatdaşlyk barada: «Men üçin Chanel — özüniň üýtgewsiz mirasyny saklap, şol bir wagtda häzirki zaman meýillerine görä yzygiderli ösýän täzelikçi moda öýüdür. Artist hökmünde öz stilime wepaly galyp, täze synaglary kabul edýärin. Şol sebäpli-de, Chanel bilen hyzmatdaşlyk menin üçin aýratyn ähmiýete eýedir» diýip gürrüň berdi.
