Hytaýyň Ylymlar akademiýasynyň alymlary Buzluk döwründen soň Demirgazyk Hytaýda ýaşap, wagtyň geçmegi bilen doly ýitip giden ynsan neslini ýüze çykardylar. Bu barada Current Biology žurnalynda habar berilýär.
Alymlar Dunhuliniň golaýynda tapylan üç sany gadymy adamyň DNK-syny barladylar. Barlagda zenanlaryň biriniň mundan 19 müň ýyl ozal Amur derýasynyň boýunda ýaşan adamlar bilen garyndaşdygy, ýöne özboluşly aýratyn bir nesle degişlidigi anyklanyldy.
Iň täsin ýeri, bu adamlaryň nesil daragty üýtgeşik bolsa-da, medeniýetiniň birmeňzeşligidir. Arheologlar şol ýerde tapylan zähmet gurallarynyň we ösümlikleri işläp taýýarlamak usullarynyň asyrlar boýy üýtgemändigini anykladylar.
Şol bir ýerden iki müň ýyldan soň jaýlanan adamyň DNK-sy bolsa eýýäm düýbünden başga – mongol taýpalaryna has ýakyn bolup çykdy. Alymlaryň çaklamasyna görä, gadymy demirgazyk nesliniň ýitip gitmegine Buzluk döwründen soňky howa üýtgeşmeleri sebäp bolan bolmaly.
Howa şertleri kynlaşansoň, bu gadymy adamlar täze ýerlere göçüp, beýleki kowumlar bilen garyşyp gidipdirler. Şol sebäpli olaryň genlerine häzirki zaman adamlarynda asla duş gelnimeýär diýen ýalydyr.
