5-nji aprelde Türkmenistanyň Ýaponiýadaky Ilçihanasynda ahalteke bedewlerini dünýä tanatmaga we atçylyk ulgamynda halkara hyzmatdaşlygy ösdürmäge bagyşlanan duşuşyk geçirildi diýip, Türkmenistanyň DIM-iniň metbugat gullugy habar berýär.
Duşuşyga Ýaponiýanyň «Akhal-teke Affinity Co. LTD» hojalyk jemgyýetiniň ýolbaşçysy Miçiko Aoe we Täze Zelandiýanyň «Krukziener Properties» kompaniýasynyň esaslandyryjysy Endrýu Krukziener gatnaşdy.
Gatnaşyjylar «Garaşsyz, baky Bitarap Türkmenistan — bedew batly at-myradyň mekany» ýylynyň çäklerinde bilelikdäki çäreleri geçirmegiň mümkinçiliklerine seretdi.
Täze Zelandiýa tarapynyň arassa ganly ahalteke atlaryny ösdürip ýetişdirmek we türkmen wekilleriniň ýurduň atçylyk toplumlaryna saparlaryny guramak mümkinçiligine aýratyn üns berildi.
Şeýle hem atçylyk pudagyny ösdürmäge bagyşlanan ugurdaş çäreleri, duşuşyklary we «tegelek stollary» guramak boýunça pikir alşyldy.
Daşary ýurtly hyzmatdaşlar her ýylyň aprel aýynyň soňky ýekşenbesinde däp bolan Türkmen bedewiniň milli baýramyna gatnaşmaga çagyryldy.
