XIX asyryň meşhur hindi suratkeşi Raja Rawi Warmanyň «Ýaşoda we Krişna» atly suraty Deli şäherinde geçirilen auksionda 1,67 milliard rupiýa (17,9 million ABŞ dollary) satyldy. Bu nyrh suratyň ilkibaşdaky 8,6–12,9 million dollarlyk möçberde çaklanylan bahasyndan ep-esli ýokary boldy. Şunlukda, kiçijik Krişnany we onuň öweý ejesi Ýaşodany şekillendirýän bu eser Hindistanyň taryhynda iň gymmat satylan surat boldy.
Raja Rawi Warma häzirkizaman hindi žiwopisiniň düýbüni tutujydyr. Ol öz işlerinde induistik rowaýatlaryň sýužetlerini has çeperçilikli ýollar bilen beýan edipdir. 1890-njy ýyllarda çekilen «Ýaşoda we Krişna» suraty hem şeýle eserleriň biridir.
Suraty dünýäniň iň uly sanjym öndürijisi bolan Serum Institute of India (SII) kompaniýasynyň eýesi, hindi milliarderi Saýrus Punawalla satyn aldy. Jenap Punawalla bu suraty milli hazyna diýip atlandyrdy we jemgyýetiň ondan lezzet alyp bilmegi üçin «wagtal-wagtal sergilere goýjakdygyna» wada berdi. Hindistanyň «Gadymy ýadygärlikler we çeperçilik hazynalary hakyndaky» kanunyna görä, «Ýaşoda we Krişna» eserini ýurtdan alyp gitmek bolmaýar we oňa diňe Hindistanyň raýatlary eýelik edip bilýär.
