Arkadag şäheriniň çägi boýunça häkimligiň ýene bir binasynyň gurluşygy dowam edýär. Bu ýerde alnyp barylýan işler bilen 4-nji aprelde Halk Maslahatynyň Başlygy Gurbanguly Berdimuhamedow tanyşdy diýip, «Watan» habarlar gepleşiginde habar berildi.
Saparyň dowamynda ol binanyň aýratynlyklaryny, mejlisler we dürli maslahatlar geçirilýän otaglary, metbugat zallaryny, şeýle hem hojalyk işlerine degişli otaglary gözden geçirdi. Binanyň gurluşygynyň barşy barada Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazow hasabat berdi.
Gurbanguly Berdimuhamedow önümçilik we durmuş maksatly binalar ýaly, edara ediş desgalarynyň enjamlaşdyrylyşynyň döwrebap talaplara laýyk gelmelidigini belledi. Şeýle desgalarda duşuşyklary geçirmek, žurnalistleriň işini guramak, şeýle hem döwrebap sanly çözgütleri ornaşdyrmak üçin amatly şertleri döretmegiň zerurdygyny aýdyp, bu babatda öz maslahatlaryny berdi.
Arkadag şäheriniň häkimi G.Mämmedowa häkimligiň işgärleriniň adyndan edara ediş desgalarynyň gurluşygynyň ýokary depginlerini üpjün etmäge berilýän ýardam üçin hoşallyk bildirdi.
Şeýle hem Halk Maslahatynyň Başlygy täze şäheriň çäginiň giňeldilmegi we ösdürilmegi bilen baglanyşykly meseleleriň hemmetaraplaýyn açylyp görkezilmegi, şonuň ýaly-da onuň halkara giňişliginde wagyz edilmegi ugrunda zerur işleriň geçirilmelidigini belledi. Şunuň bilen baglylykda, ol köpçülikleýin habar beriş serişdeleriniň ýolbaşçylaryna birnäçe maslahatlary berdi.
