Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň serişdeleriniň hasabyna Aşgabatda «Güneşli» çagalar-ýetginjekler merkeziniň gurluşygy, şeýle hem «Jahan» döredijilik merkeziniň we Bazar Amanow adyndaky kitaphananyň döwrebaplaşdyrylmagy dowam edýär. Bu meseleler Halk Maslahatynyň Başlygy Gurbanguly Berdimuhamedowyň Arkadag şäherindäki Gaznanyň ştab-kwartirasyna amala aşyran saparynyň dowamynda maslahatlaşyldy diýip, «Watan» habarlar gepleşiginde habar berildi.
Alnyp barylýan işler barada Gaznanyň bejeriş işleri boýunça wise-prezidenti Oguljahan Atabaýewa hasabat berdi. Onuň aýtmagyna görä, Bazar Amanow adyndaky kitaphanada otaglary döwrebaplaşdyrmak bilen bir hatarda, asman jisimlerini ylmy taýdan öwrenmek üçin obserwatoriýa gurmak we teleskop oturtmak meýilleşdirilýär.
«Jahan» merkezinde fitnes-zalyny, daşary ýurt dillerini öwrenmek üçin lingafon otaglaryny, ýöriteleşdirilen ders otaglaryny, açyk we ýapyk sport zallaryny ýerleşdirmek göz öňünde tutulýar. Şeýle hem çagalara dizaýn we marketing ugurlary boýunça bilim bermek meýilleşdirilýär. Şol bir wagtyň özünde diňe bir çagalar üçin däl, eýsem olaryň ene-atalary üçin hem degişli şertler döredilýär.
Merkezde dürli ugurly otaglar hereket eder, sagdyn durmuş ýörelgesini kemala getirmäge aýratyn üns berler. Bu ýerde pilates, ýoga we saýkl ýaly ugurlar boýunça fiziki işjeňlik bilen meşgullanmak üçin ähli zerur şertler üpjün ediler.
O.Atabaýewa bu desgany «Jahan» döredijilik we sport merkezi diýip atlandyrmagy teklip etdi.
Halk Maslahatynyň Başlygy bu teklibi makullady. Şunlukda, çagalaryň isleglerine we olary saýlap alan hünärlerine ugrukdyrmak meselelerine aýratyn üns berilmelidigi bellenildi.
