Halk Maslahatynyň Başlygy Gurbanguly Berdimuhamedow Arkadag şäherine amala aşyran saparynyň dowamynda 30 müň adama niýetlenen metjidiň gurluşygynyň barşy bilen tanyşdy. Bu barada 4-nji aprelde «Watan» habarlar gepleşiginde habar berildi.
Bu ýerde Halk Maslahatynyň Başlygy metjidiň töweregini synlady, şeýle hem binanyň gümmezleriniň reňk aýratynlyklaryna baha berdi. Metjidiň içerki we daşarky bezeg işlerine, onuň töweregini abadanlaşdyrmaga hem-de arassaçylyk işlerine aýratyn üns berildi.
Saparyň dowamynda Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazow işleriň depgini hem-de ozal berlen maslahatlaryň berjaý edilişi barada hasabat berdi. Metjidiň içerki bezeginiň dürli görnüşleri we oňa niýetlenen düşegiň görnüşleri görkezildi.
Gurbanguly Berdimuhamedow bezeg elementleriniň, şeýle hem düşegiň reňkleriniň şäheriň binagärlik keşbi bilen sazlaşykly saýlanyp alynmagynyň ähmiýetini belledi. Şeýle meselelerde din wekilleri bilen maslahatlaşmalary geçirmegiň zerurdygy nygtaldy.
Bezeg serişdelerini saýlap almaga, olaryň hiline, berkligine we uzak möhletleýinligine aýratyn üns çekildi. Metjidiň daşky we içki keşbi, şeýle hem yşyklandyryş ulgamy yslam dünýäsinde ähmiýetli hasaplanylýan metjide mahsus derejede bolmalydyr diýlip bellenildi.
