NASA «Artemis II» Aý missiýasynyň çäklerinde «Orion» kosmos gämisiniň bortundan alnan suraty hödürledi. Surata birbada seredeniňde Aý diýdirjek ýarymaý görnüşindäki Ýer şary şekillendirilipdir. Bu 1972-nji ýylda «Apollo» maksatnamasy tamamlanany bäri, adamyň öz planetasyny şeýle uzak aralykdan gören ilkinji pursatydyr.
3-nji aprelde «Orion» gämisiniň ekipažy Aýa tarap uçuşy dowam etdirmäge rugsat aldy. Bu hereketden soň, astronawtlar alty sagatlyk barlag-gözleg meýilnamasyna taýýarlyk görmäge başlady.
Geçiriljek gözegçilikler Aýyň we Gün ulgamynyň nähili emele gelendigine has gowy düşünmäge kömek eder diýlip garaşylýar. Şeýle hem Ýeriň hemrasynyň üstüni — kraterleri, gadymy lawa akymlaryny, jaýryklary we dag gerişlerini öwrenmek meýilleşdirilýär.
NASA «Orion» gämisiniň mundan başga-da düşüren birnäçe suratlaryny paýlaşdy. Olarda Ýer şarynyň garaňky tarapyny hem-de ýarysy garaňkylyga bürenen ýagdaýyny görüp bolýar.
«Artemis II» missiýasy 2-nji aprelde ir säher bilen ABŞ-nyň Kanaweral burnundaky kosmodromdan uçdy. Bu soňky 50 ýyldan gowrak wagtyň içinde Ýere golaý orbitanyň çäklerinden daşyna ilkinji uçarmanly uçuşdyr. Ekipažyň düzümine dört astronawt girýär. Uçuş Aýa gonmazdan, erkin dolanyş traýektoriýasy boýunça amala aşyrylýar.
