Italiýanyň milli ýygyndysy Jennaro Gattuzonyň baş tälimçi wezipesinden gidýändigini yglan etdi. Bu karar topar 2026-njy ýylyň dünýä çempionatyna gatnaşmaga hukuk gazanmak ugrundaky soňky pleý-off oýnunda ýeňlenden soň kabul edildi.
Italiýanyň Futbol Federasiýasynyň prezidenti Gabriele Grawina hem wezipesinden gitdi. Milli ýygyndynyň wekiliýetiniň başlygy wezipesini eýelän Janluiji Buffon hem topardan gitdi.
31-nji martda geçirilen aýgytlaýjy duşuşykda Italiýanyň topary Bosniýa we Gersegowinanyň toparyndan ýeňildi. Oýnuň esasy wagty 1:1 hasap bilen tamamlandy. Bosniýanyň futbolçylary penaltiler seriyasynda 4:1 hasabynda ýeňiş gazandy.
Bu ýeňlişden soň, Italiýa Dünýä çempionatyna gatnaşmaga saýlanyp bilmedi we ýaryşy yzly-yzyna üçünji gezek sypdyrar - bu topar ozal 2018-nji we 2022-nji ýyllarda hem saýlanyp bilmändi.
48 ýaşly Jennaro Gattuzo 2025-nji ýylyň iýun aýynda “Skuadru adzurru” toparynyň tälimçisi wezipesine geçdi. Onuň ýolbaşçylygynda topar sekiz oýna gatnaşdy, olaryň altysynda ýeňiş gazandy we ikisinde ýeňildi, gollaryň arasyndaky tapawut bolsa 23:14 boldy.
Gattuzo mundan öň Horwatiýanyň "Haýduk ", Italiýanyň "Palermo", "Piza", "Milan" we "Napoli", Şweýsariýanyň "Sýon", Gresiýanyň OFI, Ispaniýanyň "Walensiýa" we Fransiýanyň "Marsel" toparlarynda tälimçi bolup işledi. Onuň ýolbaşçylygynda "Napoli" 2020-nji ýylda Italiýanyň Kubogyny gazandy.
Sky Sport Italia neşiriniň habar bermegine görä, baş tälimçi wezipesine dalaşgärleriň arasynda Massimiliano Allegri we Antonio Konten göz öňünde tutulýar.
