Angliýadaky futbol janköýerleriniň agramly bölegi eminlere wideogözegçilik kömegi ulgamynyň (VAR) ulanylmagyna oňaýsyz baha berýärler. Bu barada Futbol janköýerleriniň birleşiginiň geçiren pikir soraşmasynyň maglumatlaryna salgylanyp, «The Guardian» neşiri habar berýär.
Geçirilen barlaga görä, sorag-jogaba gatnaşanlaryň 91%-i VAR ulgamynyň aýrylmalydygyny belleýär, diňe 2%-i bolsa bu tehnologiýany goldaýar. Sorag-jogaba 7 müňden gowrak adam gatnaşdy, olaryň aglabasy yzygiderli oýunlara barýan muşdaklardyr.
Şol bir birleşigiň Premýer-liganyň klublarynyň janköýerleriniň arasynda geçiren ugurdaş barlagy bolsa, olaryň takmynan 75%-iniň iňlis çempionatynyň oýunlarynda VAR-yň ulanylmagyna garşydygyny görkezdi. Şeýle hem, sorag edilenleriň 94%-i bu ulgam oýunlary telewizorda görmegi oňaýsyz edýär diýip hasaplaýarlar.
Şunuň bilen birlikde, gatnaşanlaryň ýarysyndan gowragy şu möwsümiň täze girizilen düzgünine — eminleriň oýun wagtynda berýän kararlaryny düşündirmegine oňyn baha berdiler.
«Netijeler janköýerleriň aglabasynyň VAR-y aýyrmak isleýändigini görkezýär. Biz eýýäm köp wagtdan bäri VAR bilen ýaşaýarys we onuň oýna oňaýsyz täsir edýändigine göz ýetirdik. Adamlar munuň wagt alýandygyndan, takyklygyndan we gol dabaralarynyň duýdansyzlygyna zyýan ýetirýändiginden gaharlanýarlar. VAR futbolyň bolmaly tebigylygyny we şol aýratyn pursatlary elimizden alýar» diýip, Futbol janköýerleriniň birleşiginiň dolandyryjysy Tomas Konkannon BBC-ä beren interwýusynda aýtdy.
