Dagystanda dowam edýän çakdanaşa güýçli ýagyşlar uly göwrümli suw joşgunyny emele getirdi. Tebigy hadysa zerarly 14 sany etrapda elektrik üpjünçiligi kesildi. Sebitiň paýtagty Mahaçkala şäherinde 60 müňden gowrak adam çyrasyz galdy we şeýle ýagdaýyň täsiri umumylykda sebit boýunça 327 müňden gowrak adama ýetdi.
Iň agyr ýagdaý Mahaçkala, Derbent we Dagestanskiýe Ogni şäherlerinde hasaba alyndy. Paýtagtda onlarça jaýy, aýratyn hem hususy howlylary suw basdy. Mash hem-de Shot Telegram-kanallary 20-den gowrak jaýyň suw astynda galandygyny, 30-dan gowrak awtoulagy bolsa suw akymynyň alyp gidendigini habar berýär.
Derbentde derýalar hanasyndan çykyp, ýollary suw basdy. Dag eňňitlerinden inýän güýçli suw akymlary ýoldaky awtoulaglary agdaryp, alyp gitdi. Hasawýurtda siliň netijesinde demir ýol köprüsi weýran boldy we otly gatnawy wagtlaýynça togtadyldy. Mahaçkalada bolsa adatdan daşary ýagdaý yglan edildi. Käbir ýerlerde suwuň derejesi 1,5 metre çenli ýetdi.
Häzirki wagtda ähli adatdan daşary ýagdaýlar boýunça gulluklar güýçlendirilen iş tertibine geçirildi. Halas edijiler ýaşaýjylary gaýyklar arkaly ewakuasiýa edýärler.
Sinoptikleriň çaklamasy boýunça ýaramaz howa ýene birnäçe gün dowam eder. Şonuň üçin häkimiýetler ýaşaýjylary seresap bolmaga we mümkin boldugyndan öýden çykmazlyga çagyrýarlar.
