2026-njy ýylyň 4-nji aprelinde futbol boýunça Türkmenistanyň Ýokary ligasynyň täze möwsümi resmi taýdan başlanýar. Nobatdaky çempionatda sekiz topar — «Arkadag», «Ahal», «Altyn Asyr», «Şagadam», «Nebitçi», «Aşgabat», «Merw» we «Köpetdag» — dört aýlawyň dowamynda çempionlyk ugrunda bäsleşer.
Çempionatyň ilkinji iki aýlawy 4-nji aprel bilen 20-nji iýun aralygynda geçiriler, üçünji we dördünji aýlawlaryň oýunlary bolsa möwsümiň ikinji ýarymynda dowam eder. Ýaryşyň ilkinji gününde «Ahal» — «Köpetdag» hem-de «Şagadam» — «Nebitçi» toparlary duşuşsa, 5-nji aprelde «Arkadag» — «Merw» we «Altyn Asyr» — «Aşgabat» duşuşyklaryna garaşylýar.
Ýatladyp geçsek, geçen möwsümiň çempiony «Arkadag» topary bolupdy, «Ahal» kümüş, «Altyn Asyr» bolsa bürünç medaly eýeläpdi.
Şonuň bilen birlikde, Ýokary liganyň ýaşlar düzümleriniň arasyndaky Türkmenistanyň birinjiligine hem 3-nji aprelde badalga berildi. Ýaşlar birinjiligi hem sekiz toparyň gatnaşmagynda dört aýlawdan ybarat bolup, duşuşyklar esasy toparlaryň oýunlaryndan bir gün öň geçiriler. Täze möwsümiň ilkinji tapgyrynda ýaşlar düzümleriniň arasynda «Ahal II» — «Köpetdag II», «Şagadam II» — «Nebitçi II», «Arkadag II» — «Merw II» we «Altyn Asyr II» — «Aşgabat II» oýunlary bolar.
