Howanyň hilini gowulandyrmak maksady bilen Daşkentde we Daşkent welaýatynda emeli ygal ýagdyrmak tehnologiýasy ulanylar. Bu çözgüt Özbegistanyň Prezidentiniň howanyň hilini gowulandyrmak baradaky Permanyna laýyklykda durmuşa geçiriler.
Şeýlelikde, 2027-nji ýylyň 1-nji oktýabryna çenli Daşkent şäherinde we Daşkent welaýatynyň çyglylygy pes bolan çäklerinde emeli ýagyş ýagdyrmak üçin zerur bolan enjamlar gurlar. Emeli ýagyş ýagdyrmak tehnologiýasy daşary ýurt tejribesini nazara almak bilen tapgyrlaýyn esasda ornaşdyrylar.
Taslamanyň maksady ýagynlaryň möçberini tebigy derejesi bilen deňeşdirilende 10–20% artdyrmakdan ybaratdyr.
Emeli ýagyn ýagdyrmak tehnologiýasynyň ulanylmagy howadaky tozan bölejikleriniň we hapalaýjy maddalaryň mukdarynyň azalmagyna ýardam eder hem-de atmosferanyň hiliniň gysga wagtlaýyn gowulanmagyny üpjün eder.
Mundan başga-da, bu başlangyç gurakçylyk we yssy howa şertlerinde daşky gurşawyň çyglylyk derejesini ýokarlandyrmaga kömek eder diýlip garaşylýar.
Bu çäreleri maliýeleşdirmek işi umumymilli ekologik meselelerini çözmek üçin niýetlenen Döwlet maksatly gaznasynyň hasabyna amala aşyrylar.
