Toyota kompaniýasy yzky oturgyçlaryndaky kemçilik sebäpli Hytaýda ýarym milliondan gowrak awtoulagyny yzyna çagyrýandygyny yglan etdi. Bu barada Hytaýyň kadalaşdyryjy edarasyna salgylanyp, Reuters agentligi habar berýär.
Yzyna çagyryş kampaniýasyna 318 müňe golaý Highlander krossoweri, şeýle hem Hytaý bazary üçin ýörite işlenip düzülen Crown Kluger modeliniň 243 müňe golaýy degişli. Bu model kuzowynyň uzynlygynyň 50 mm artykmaçlygy we salonyň has gymmat bezegi bilen tapawutlanýar.
Kadalaşdyryjy edaranyň maglumatyna görä, mesele yzky oturgyjyň arkalygyny sazlaýjy mehanizm bilen baglanyşyklydyr. Yzyna gaýtaryjy pružinanyň aşa artyk güýçli bolmagy sebäpli, oturgyjyň arkalygy gowy berkidilmän biler, bu bolsa heläkçilik bolan ýagdaýynda şikes almak töwekgelçiligini artdyrýar.
Mundan ozal Hytaýda Toyota RAV4-iň täze nesli hem yzyna çagyrylypdy. Onuň sebäbi multimedia ulgamynyň programma üpjünçiligindäki näsazlyk bolup, ol programmany täzelemek arkaly düzedilýär.
