Latyn Amerikasy dünýäniň esasy azyk üpjün edijileriniň biri hökmündäki ornuny berkidýär. Sebitdäki ýurtlar soýa we sygyr etinden başlap, kofe we awokado çenli dünýäde üpjünçiligiň uly bölegini emele getirýär.
Seljerijiler häzir diňe bir sebitiň artýan islegine jogap bermän, eýsem oňa täsiriniň güýçlenýändigini belleýärler.
Braziliýa kofe, soýa, mekgejöwen, şeker çiňrik we sygyr etini öndürmekde öňdebaryjy bolmagynda galýar. Bu ýurt dünýäde kofe öndürmekde öňdeligi eýeleýär we soýa hem-de sygyr etiniň iň uly eksportçylarynyň biridir.
Argentinanyň orny hem uly, ol soýa, mekgejöwen, bugdaý we sygyr etini öndürmekde ýokary derejeleri görkezýär. Ol soýa ununyň we mekgejöweniň öňdebaryjy eksportçysy bolmak bilen, Aziýany we Ýewropa ýurtlaryny önüm bilen üpjün edýär.
Market Data Forecast-yň maglumatlaryna görä, sebitiň oba hojalyk bazary azyk önümlerine, bioýangyja we oba hojalyk önümlerine bolan isleg sebäpli öser.
Beýleki ýurtlar eksportyň anyk ugurlaryna ünsi jemleýärler. Meksika işjeň ýagdaýda awokado, pomidor we miweleri eksport edýär. Kolumbiýa kofesi we gülleri bilen, Ekwador bolsa bananlary we krewetkalary bilen tanalýar. Peru awokadonyň, üzümiň we sparjanyň eksportyny artdyrýar, Çili bolsa miwe, çakyr we losos önümçiligini ösdürýär.
Seljerijiler önümleriň dürlüliginiň, amatly howa şertleriniň we oba hojalyk tehnologiýalaryna goýulýan maýa goýumlaryň sebitiň dünýä bazaryndaky ornuny berkitmegine kömek edýändigini belleýärler.
