Hytaýyň kosmos kompaniýasy orbitada çeýe robot goluny synagdan geçirdi. Bu işläp düzme kosmos gämilerine ýangyç guýmak we hyzmat etmek üçin niýetlenendir.
Bu enjam Sinhua uniwersitetiniň Şençžendäki Halkara ýokary mekdebiniň hünärmenleriniň gatnaşmagynda işlenip düzüldi. Manipulýator kabel hereketlendirijili çeýe, işi boş gurluşdyr.
Synag wagtynda ol Ýerden ýüzlerçe kilometr belentlikde ýangyç portlary bilen takyk sepleşmek işini amala aşyrdy. Gaty gurluşlardan tapawutlylykda, manipulýator bükülip we görnüşini üýtgedip bilýär, bu bolsa oňa çäkli giňişliklerde işlemäge mümkinçilik berýär.
Sustain Space kompaniýasynyň maglumatyna görä, 2026-njy ýylyň 16-njy martynda Szýusýuan hemra uçuryş merkezinden Kuaizhou-11 raketasynda uçurylan Yuxing-3 06 hemrasy eýýäm birnäçe operasiýany amala aşyrdy. Bularyň arasynda awtomatiki ýangyç guýulmagynyň simulýasiýa edilmegi, Ýerden dolandyrylýan modelirlemeler we wizual gönükdirme ýaly operasiýalar bar.
Ylmy-barlag toparynyň ýolbaşçysy Wan Sýuesýan şeýle tehnologiýalaryň hemralary abatlamaga we ýangyç bilen doldurmaga, şeýle hem orbitalary kosmos galyndylaryndan arassalamaga mümkinçilik berjekdigini belledi.
