Sony kompaniýasy «dünýä ykdysadyýetindäki dartgynly ýagdaý» sebäpli, 2-nji aprelden başlap PlayStation 5 oýun enjamlarynyň bahasyny ýokarlandyrjakdygyny yglan etdi.
ABŞ-da disk salyp bolýan görnüşiniň bahasy 550 dollardan 650 dollara çenli ýokarlanar. PS5 Digital Edition görnüşiniň bahasy bolsa 100 dollar gymmatlap, 600 dollara ýeter.
PS5 Pro modeli (Sony konsolynyň iň güýçli görnüşi) 150 dollar gymmatlar we onuň bahasy 850 dollar bolar.
Şeýle hem, PlayStation Portal Remote Player enjamynyň (PS5-den oýunlary striming arkaly oýnamak üçin enjam) bahasy 200 dollardan 250 dollara üýtgär.
«Bahalaryň üýtgemeginiň biziň jemgyýetimize täsir edýändigine düşünýäris, ýöne düýpli seljermelerden soň, bütin dünýädäki oýunçylara innowasion we ýokary hilli oýun mümkinçiliklerini hödürlemegi dowam etdirmek üçin munuň zerur ädimdigi baradaky netijä geldik» – diýip, Sony kompaniýasy mälim etdi.
PlayStation 5 2020-nji ýylyň noýabrynda, Pro görnüşi bolsa 2024-nji ýylyň noýabrynda satuwa çykaryldy. Kompaniýanyň maglumatlaryna görä, 2025-nji ýylyň ahyryna çenli 92,2 million konsol satyldy. PlayStation Network ulgamynyň aýlyk ulanyjylarynyň sany 2025-nji ýylyň sentýabryna çenli 132 milliona ýetdi.
