Samsung kompaniýasy Galaxy A36 we A56 modelleriniň ýerini tutjak Galaxy A37 we A57 smartfonlaryny hödürledi. «GSMArena» neşiriniň habar bermegine görä, täze modeller has çydamly korpusa, ýokary öndürijilige hem-de kämilleşdirilen kamera we emeli aň funksiýalaryna eýe boldy.
Uly model Galaxy A57 kämilleşdirilen grafika we neýron blogy bolan 4 nanometrlik Exynos 1680 prosessorynda işleýär. Operatiw ýadyň göwrümi 12 GB, içerki ýadyňky bolsa 512 GB ýetýär. Smartfonyň durnukly işlemegi üçin ulaldylan sowadyş ulgamy ulanylýar. Smartfon öňkülerden has inçe we ýeňil boldy — onuň galyňlygy 6,9 mm, agramy bolsa 179 g (ozalky modeliňki, degişlilikde, 7,4 mm we 198 g).
Galaxy A37 modeli bolsa Exynos 1480 prosessory, 8 GB çenli operatiw ýat we 256 GB çenli içerki ýat bilen enjamlaşdyryldy. Onuň korpusy we ölçegleri üýtgewsiz galdy.
Iki model hem IP68 standarty boýunça suwdan we tozandan goragly (ozal IP67 ulanylýardy). Enjamlar 120 Gs ýygylykly 6,7 dýuýmlyk ekranlar we Gorilla Glass Victus+ gorag aýnasy bilen üpjün edildi.
Smartfonlar esasy kamerasy 50 Mp bolan täzelenen üçli kameranyň kömegi bilen hatda garaňkylykda-da suratlary aýdyň düşürmäge mümkinçilik berýär. Şeýle-de, Galaxy A57-de 12 Mp, A37-de bolsa 8 Mp giň burçly modul we makrokameralar hem-de 12 Mp frontal kameralar bar.
Smartfonlar goşmaça zarýad bermezden iki gün işlemegi üpjün edýän 5000 mAs sygymly batareýa bilen enjamlaşdyryldy. 45 Wt çalt zarýad alyş bolsa ýarym sagatda batareýany 60% zarýadlandyrmaga mümkinçilik berýär. Satuwlar bazara baglylykda 9–10-njy aprelde başlar.
ABŞ-da Galaxy A37-niň bahasy 450 dollardan başlaýar, Galaxy A57-niň başlangyç görnüşi bolsa 550 dollara düşer. Ýewropada täze modelleriň bahasy, degişlilikde, 430 ýewro we 530 ýewro bolar.
