Spotify platformasy saz eserleriniň döredilmegine kimiň we nähili gatnaşandygyny bilmäge mümkinçilik berýän täze "SongDNA" funksiýasyny tanyşdyrdy. Häzirki wagtda bu mümkinçilik diňe "Premium" abunasy bolan ulanyjylar üçin elýeterlidir.
Bu funksiýanyň kömegi bilen ýazgy edilen wagty gatnaşanlaryň sanawyny görmäge, sazyň ýaňlanmasyny emele getiren sempller barada öwrenmäge, şeýle hem aýdyma ýerine ýetirilen kawer (cover) wersiýalaryny tapmaga mümkinçilik bar.
"Siz görkezilen islendik awtoryň sahypasyna geçip, olaryň ýene kimler bilen işleşendigini bilip we bilelikdäki taslamalaryny öwrenip bilersiňiz. Bu aýdymlaryň arasyndaky baglanyşygy yzarlamagyň, ýerine ýetirijileriň, döwürleriň we žanrlaryň nähili utgaşýandygyny görmegiň interaktiw usulydyr. Şeýlelikde, diňleýän zatlaryňyzyň nähili döredilendigine has içgin düşüniň" diýip, Spotify mälim etdi.
Şol bir wagtda, bu funksiýa ähli aýdymlar üçin goldanylmaýar, sebäbi aýdymçylar öz sazlary baradaky haýsy maglumatlary aýan etmelidigini özleri kesgitleýärler.
Täze funksiýa 2026-njy ýylyň fewralynda hödürlenen we eserleriň döreýiş sebäpleri hem-de manysy barada gürrüň berýän "Bu aýdym barada" (About this song) funksiýasyna meňzeşdir.
Şeýle hem, hyzmat häzirki wagtda sazandalara öz täze aýdymlaryny çap edilmezinden ozal gözden geçirmäge mümkinçilik berýän "Aýdymçynyň profilini goramak" (Artist Profile Protection) ulgamyny synagdan geçirýär.
