Sony Honda Mobility bilelikdäki kärhanasy «Afeela» elektromobil taslamasynyň ýapylýandygyny yglan etdi. Bu karar Honda-nyň elektrokar ösdürmek baradaky meýilnamalaryna täzeden seretmegi bilen baglanyşyklydyr.
Ilkinji modeliň eýýäm şu ýyl bazara çykaryp başlanmagyna garaşylýardy. Deslapky sargytlary kabul etmek işi açykdy, emma indi müşderileriň tölän serişdeleri yzyna gaýtarylyp berler.
Taslama Honda-nyň awtomobil tehnologiýalaryny hem-de Sony-nyň elektronika ugrundaky işläp düzmelerini birleşdirmelidi. Hyzmatdaşynyň ýüz öwürmeginden soň, Sony awtoulag öndürmek üçin önümçilik binýatsyz galdy.
16-njy martda Kaliforniýada «Afeela» studiýasy we awtoulaglary gowşuryş nokady açylypdy, şeýle hem «Afeela 1» sedany üçin sargytlar kabul edilip başlanypdy. Modeliň bahasynyň 89 900 dollardan başlamagyna garaşylýardy, deslapky töleg bolsa 200 dollara deňdi.
Mundan öň, tutuş awto-önümçilik pudagynyň häzirki meýillerine eýerip, Honda ABŞ-da öndürmegi meýilleşdiren üç sany şahsy elektromobil taslamasyndan hem ýüz öwürdi.
Bu karar dünýä bazarynda islegiň peselmegi sebäpli kabul edildi. Kompaniýanyň strategiýany üýtgetmeginden görjek zyýany 15,7 milliard dollar töweregi diýlip çaklanylýar.
