Maýa Kulyýewa adyndaky Türkmen milli konserwatoriýasynda türkmen saz sungatynyň görnükli wekili, ussat sazanda Şükür bagşynyň doglan gününiň 195 ýyllygy mynasybetli döredijilik duşuşygy geçirildi.
Dabaranyň açylyşynda Tahyr Ataýewiň ýolbaşçylygyndaky kamera orkestri tarapyndan Nury Halmämmedowyň «Şükür bagşy» kinofilmi üçin ýazan sazy ýerine ýetirildi. Çäräniň dowamynda Türkmenistanyň halk artistleri Ýolaman Nurymow we Akmyrat Çaryýew hem-de uly mugallym Aganazar Öwezgeldiýew «Salmadan bökdüren», «Şadilli» ýaly nusgawy halk sazlary bilen çykyş edip, dabara aýratyn şowhun goşdy.
Duşuşygyň dowamynda taryhçy mirasgär Nurnazar Jumanazarow Şükür bagşynyň durmuş ýoly we onuň türkmen saz sungatynyň altyn hazynasyndaky orny barada gyzykly maglumatlary paýlaşdy.
Konsert maksatnamasy «Türkmen-gaz» döwlet konserniniň medeni işewürlik merkeziniň ansamblyndan bagşy Kyýas Durdyýewiň «Dutarym» aýdymyny ýerine ýetirmegi bilen baýlaşdyryldy. Döredijilik duşuşygy dutarçy talyplar topary tarapyndan Şükür bagşynyň «Sallana» eseriniň ýaňlanmagy bilen tamamlandy.
