OpenAI kompaniýasy emeli aňyň kömegi bilen surat we wideo döretmek üçin niýetlenen Sora taslamasyny ýapmak barada netijä geldi. Şunuň bilen baglylykda, Disney kompaniýasy OpenAI bilen baglaşan 1 milliard dollarlyk şertnamasyndan ýüz öwürdi diýip, «Variety» neşiri habar berýär.
Çeşmeleriň maglumatyna görä, OpenAI-yň baş direktory Sem Altman bu çözgüt barada işgärlerine 24-nji martda mälim edipdir. Taslamanyň ýapylmagynyň sebäpleri resmi taýdan aýan edilmedi. Kompaniýa ulanyjylara we işläp düzüjilere minnetdarlyk bildirip, bu habaryň lapykeçlik döredip biljekdigine düşünýändiklerini belledi.
«Biz Sora bilen hoşlaşýarys. Sora-nyň kömegi bilen döreden, paýlaşan we onuň töwereginde jemgyýetçiligi emele getirenleriň hemmesine sagbolsun aýdýarys. Siziň Sora bilen amala aşyran işleriňiz örän möhümdi we bu täzeligiň lapykeç edip biljekdigine düşünýäris» — diýlip, «Sora» toparynyň beýanatynda aýdylýar.
Işläp düzüjiler, şeýle hem, programmanyň we API-niň iş möhletleri, şeýle hem döredilen materiallary saklap galmagyň usullary barada maglumatlary soňrak berjekdiklerini habar berdi.
Sora 2024-nji ýylda tekst beýany esasynda gysga wideolary döretmäge ukyply gural hökmünde tanyşdyrylypdy. 2025-nji ýylda bolsa onuň täzelenen Sora 2 wersiýasy çykdy.
Üç aý mundan ozal OpenAI we Disney üç ýyl möhlet bilen ylalaşyk baglaşdy. Taslama laýyklykda, Sora-nyň kontent döretmek üçin Disney, Pixar, Marvel we Star Wars gahrymanlaryny ulanmagy hem-de olaryň bir böleginiň «Disney+» platformasynda ýerleşdirilmegi meýilleşdirilipdi.
Mundan başga-da, Disney kompaniýasy OpenAI-a 1 milliard dollar maýa goýmagyň mümkinçiligine seredýärdi. Sora-nyň ýapylmagy baradaky çözgütden soň, bu meýilnamalar ýatyryldy.
«Emeli aňyň täze döräp başlan ugrunyň çalt ösýändigi sebäpli, biz OpenAI-yň wideo-kontent döretmek işinden çekilmek we öz ileri tutýan ugurlaryny başga tarapa gönükdirmek baradaky çözgüdine hormat goýýarys. Biz toparlarymyzyň arasyndaky netijeli hyzmatdaşlyga we onuň üsti bilen öwrenen tejribelerimize ýokary baha berýäris» — diýip, Disney tarapyndan mälim edildi.
