Gazagystanyň Almaty şäherindäki Saýran kölüne guýýan derýanyň eteginde 10 ýyl mundan ozal bolup geçen waka — suwa gaçan itiň halas edilişine bagyşlanan ýadygärlik dikildi.
Waka 2016-njy ýylyň iýunynda bolup geçipdi. Şonda köle baryp guýýan Uly Almaty derýasyna it gaçýar. Ýerli ýaş ýigitleriň biri ony halas etmek üçin aşak düşýär. Soňra tötänden gabat gelen ötegçiler el tutuşyp, zynjyra düzülip, olaryň ikisinem suwdan çykarmagy başarypdylar. Bu wakanyň wideosy internetde ýaýrap, giň köpçüligiň seslenmesini gazanypdy.
Instalýasiýasy suratkeş hem heýkeltaraş Ýerbosyn Meldibekow döretdi. Ol bu wakany häzirki zaman sungatynyň serişdeleri arkaly beýan etmegi we gatnaşyjylaryň hereketlerini dürli taraplardan suratlandyrmagy maksat edinendigini gürrüň berdi.
"Bu wakanyň örän möhüm bir tarapy bar: ondan dokumental surat we wideo materiallar galdy. Hut şu ýerde men bu gahrymanlaryň goýan yzyny, olaryň hereketlerini dürli taraplardan we häzirki zaman sungatynyň stilinde galdyrmak isledim" — diýip, suratkeş belledi.
Bürünçden döredilen heýkel diňe bir bolan wakalary ýatlatman, eýsem, islendik pursatda-da birek-birege kömege ýetişmegiň ähmiýetini alamatlandyrýar.
