Apple kompaniýasynyň ýolbaşçysy Tim Kuk geçen hepdede ilkinji gezek Mac kompýuterini satyn alan ulanyjylaryň sany boýunça rekord goýlandygyny mälim etdi.
Islegiň artmagy geçen hepde dükanlara çykarylan täze MacBook Neo modeliniň satuwa başlamagy bilen gabat geldi. Onuň bahasy häzirki wagtda iň elýeterli hasaplanýan MacBook Air modelinden hem takmynan iki esse arzan.
Apple kompaniýasynyň ABŞ-daky resmi saýtynda bu noutbuklaryň doly satylyp gutarandygy we täze önümleriň gelmegine iki-üç hepde garaşylmalydygy bellenilýär.
MacBook Neo satuwa çykarylandan soň «iFixit» taslamasynyň hünärmenleri noutbugy söküp gördüler we bu modeliň soňky 14 ýylyň içinde Apple enjamlarynyň arasynda abatlamak üçin iň amatly modeldigini anykladylar. Ekspertler özleriniň ýörite görkeziji bahalary boýunça oňa 10-dan 6 bal berdiler.
Noutbugyň aşaky gapagy sekiz sany nurbat bilen berkidilipdir. Olary towlap aýranyňdan soň, korpusy hiç hili goşmaça gural ulanmazdan, el bilen açyp bolýar. Şeýle gurluş esasy böleklere — akkumulýatora, dinamikalara, USB-C portlaryna we trekpada elýeterliligi ýönekeýleşdirýär.
Iň uly üýtgeşmeler batareýanyň berkidilişinde ýüze çykdy. MacBook-laryň köp modellerinde akkumulýator korpusa ýelmenýän bolsa, MacBook Neo-da ol 18 sany nurbat bilen berkidilipdir. Bu bolsa batareýany çalşyrmagy aňsatlaşdyrýar we abatlaýyş wagtynda zeper ýetirme töwekgelçiligini azaldýar.
Käbir bölekleri serwis hyzmatyny etmek bolsa heniz hem çylşyrymlylygyna galýar. Meselem, klawiaturany çalşyrmak üçin 41 sany nurbaty towlamaly bolýar. Korpusyň içki tarapynda «Torx Plus» nurbatlarynyň ölçeglerini görkezýän bellikleriň goýulmagy ussalaryň işini ýeňilleşdirer.
Ekspertler USB-C portlarynyň we gişulaklyk deşiginiň modully gurluşyna ýokary baha berdiler. Olary ene plata degmezden, aýratynlykda çalşyryp bolýar. Şeýle hem, täze modeliň displeýi MacBook-laryň soňky nesillerine garanyňda has aňsat aýrylýar.
