BTS k-pop toparynyň Seulda geçirilýän konserti Günorta Koreýanyň ykdysadyýetine ýüzlerçe million dollar peýda getirip biler. Bu barada Yonhap News Agency agentligi maliýe ministri Ku Ýun Çhola salgylanyp habar berýär.
Onuň aýtmagyna görä, toparyň täzeden birleşmegi düýpli ykdysady täsir döreder.
"Bu konsertiň trillionlarça won ykdysady peýda getirmegine garaşylýar, ýöne onuň maddy däl täsirleri ençeme, hatda onlarça esse köp bolup biler" diýip, ministr belledi.
Maliýe ministri BTS-iň ýene konsert berip başlamagynyň ýurduň ykdysadyýetiniň janlanmagyna ýardam etjekdigini aýtdy. Şeýle hem ol sazyň Ýakyn Gündogardaky wakalar sebäpli biynjalyk bolýan köp sanly adama umyt berjekdigini belledi.
Koreýanyň medeniýet we syýahatçylyk instituty konsertiň ykdysady täsirini 1,2 trillion won (takmynan 900 million dollar) möçberinde bahalandyrdy. Bloomberg agentliginiň maglumatyna görä bolsa, diňe bir konsert Seulyň ykdysadyýetine takmynan 177 million dollar girdeji getirip biler.
Konsert şu gün Seulyň merkezindäki Kwanhwamun meýdançasynda geçirilýär. Oňa 260 müňe çenli tomaşaçynyň gelmegine garaşylýar.
