18-nji martda başlanyp, birnäçe günläp dowam eden güýçli ýagyşlar Kolumbiýanyň paýtagty Bogotanyň 40 km günbatarynda ýerleşýän Fakatatiwa şäherinde suw joşgunyna getirdi. Ýerli häkimiýetleriň berýän resmi maglumatlaryna görä, bu tebigy apatdan 1000-den gowrak maşgala zyýan çekdi.
20-nji martda, takmynan daňdan sagat 04:00 töweregi derýalar we çeşmeler, şol sanda Rio-Botello derýasy öz hanasyndan agdy. Suw joşguny esasan Los-Manzanos we La-Selwa ýaly ýaşaýyş nokatlaryna agyr zeper ýetirdi. Ýerli ýaşaýjylar öýleriň içindäki suwuň derejesiniň bir metrden hem geçendigini gürrüň berýärler.
Kundinamarka departamentiniň gubernatory Horhe Emilio Reý sebitde azyndan 14 sany iri göwrümli adatdan daşary hadysanyň hasaba alnandygyny aýtdy.
Günüň dowamynda halas ediş gulluklary — ýangyn söndürijiler, polisiýa we Gyzyl Ýarymaý jemgyýetiniň işgärleri güýçlendirilen tertipde işlediler. Olar suwy sorup çykarmak we adamlary howpsuz ýerlere göçürmek işlerini alyp bardylar.
Müňden gowrak adam ýörite taýýarlanan wagtlaýyn merkezlere ýerleşdirildi. Apatdan zyýan çekenlere gyzgyn naharlar, arassaçylyk serişdeleri we iň zerur bolan gündelik harytlar paýlandy.
Milli gidrometeorologiýa agentligi ýakyn günlerde ýene-de güýçli ýagyş ýagmagynyň mümkindigini duýdurýar. Topragyň çendenaşa çyglylygy sebäpli, And daglarynyň eteklerinde ýer süýşgünleriniň döreme howpy-da artýar. Häkimiýetler ýaşaýjylary seresap bolmaga çagyrýarlar.
