Hytaý 2026-njy ýylyň başynda kümüş importyny ep-esli artdyrdy. Satyn alyşlar soňky sekiz ýylda iň ýokary derejesine ýetdi diýip, «Bloomberg» habar berýär.
Import edijiler ýurduň içindäki senagat we maýa goýum isleglerini kanagatlandyrmak üçin çig maly gyssagly satyn alýar. Ýanwar we fewral aýlarynda Hytaý 790 tonnadan gowrak kümüş import etdi. Şonuň 470 tonna golaýy fewral aýyna düşdi — bu bolsa şol aý üçin rekord görkezijidir.
Ýokary isleg Hytaýyň öz içinde kümşüň bahalarynyň halkara derejesinden ep-esli ýokary galmagyna getirdi. Şol bir wagtyň özünde, Hytaýyň biržalaryndaky metal gorlarynyň çalt azalmagy daşary ýurtdan kümşüň getirilmegini has-da güýçlendirýär.
Bu ýagdaýa hünärmenler hem senagat, hem-de hususy maýadarlar tarapyndan islegiň birden ýokarlanmagynyň sebäp bolandygyny aýdýar. Gün panellerini öndürijiler 1-nji aprelden başlap eksport salgyt ýeňillikleriniň ýatyrylmagynyň öňüsyrasynda önümçiligi artdyrýar. Gün energetikasy pudagy, adatça, kümşüň global göwrüminiň, takmynan, 20%-ini sarp edýär.
Şol bir wagtda, bölek söwda maýadarlary kümüş tokgalaryny altyna garanyňda has elýeterli alternatiwa hökmünde görüp, işjeň satyn alýar.
«Kümüş tokgalaryna bolan isleg örän güýçli, gün panellerini öndürijiler bolsa batly depginde işleýär — diýip, StoneX Group Inc. kompaniýasynyň EMEA we Aziýa bazarlaryny seljeriş bölüminiň ýolbaşçysy Rona O’Konnell belledi. — Şol bir wagtda, Hytaýyň biržalaryndaky gorlar göz açyp-ýumasy salymda azalýar, bu bolsa öz-özünden alyjylara güýçli psihologik täsir edýär».
