Hytaýyň «Týangun» orbital stansiýasyndaky «Şençžou-21» missiýasynyň ekipažy «kosmos pomidorlarynyň» ilkinji hasylynyň üstünlikli ýygnalandygyny habar berdi. Hytaýyň merkezi telewideniýesiniň (CCTV) maglumatyna görä, astronawtlar aeroponika desgasynyň kömegi bilen "çerri" pomidorlary ösdürip ýetişdirdiler. Olar bişen miweleri surata düşürip, saýlap aldylar we soňraky barlaglar üçin ösümlikleri we hasyly germetik usulda gapladylar.
Ýakyn wagtda bugdaý, käşir we dermanlyk ösümlikleri bilen ylmy tejribeleri geçirmek meýilleşdirilýär. Astronawtlar mikrograwitasiýa şertlerinde ösdürip ýetişdirmek tehnologiýalaryny barlamak we uzak möhletli missiýalarda durmuşy üpjünlik ulgamlary üçin ekinleriň görnüşlerini giňeltmek isleýärler.
Aeroponika ulgamy suwy örän ownuk duman görnüşinde pürkýär, bu bolsa suwdan peýdalanmagyň netijeliligini ýokarlandyrýar we ösümlikleriň ösmegi üçin iň amatly şertleri döredýär.
Agrobiologik tejribelerden başga-da, ekipaž materiallaryň fizikasy boýunça wezipeleri ýerine ýetirýär, durmuşy üpjün ediş ulgamynyň enjamlaryna hyzmat edýär we stansiýadaky mikrobiologik ýagdaýa gözegçilik edýär. Astronawtlar lukmançylyk ewakuasiýasy boýunça türgenleşikleri geçýärler we saglyk ýagdaýyna gözegçilik etmek üçin gan seljermelerini geçirýärler.
Alnan maglumatlar geljekki ekspedisiýalar üçin awtonom iýmit ösdürip ýetişdiriş ulgamlaryny kämilleşdirmäge kömek eder.
«Şençžou-21» missiýasy 2025-nji ýylyň 31-nji oktýabrynda Sýusýuan kosmodromyndan başlandy, açyk kosmosa ilkinji çykyş bolsa 9-njy dekabrda amala aşyryldy.
