«Pakistanyň Karaçi şäherini örän güýçli harasat gaplap aldy» diýip, Euronews habar berýär. Güýçli ýagyş we şemal bilen gelen zabun howanyň netijesinde azyndan 19 adam pida boldy, köp sanly ýaşaýjy bolsa dürli şikese uçrady.
Tebigy apat binalaryň üçeklerini we diwarlaryny ýykdy, agaçlary köki bilen goparyp, mahabat tagtalaryna zeper ýetirdi. Şeýle-de käbir ýaşaýjylaryň elektrik togunyň urmagy sebäpli ejir çekendigi bellenilýär.
Aşa köp ýagan ýagyn birnäçe etraplarda suw joşgunlaryna sebäp boldy. Köçeler suwuň astynda galyp, ulaglaryň hereketini we adatdan daşary hyzmatlaryň işini kynlaşdyrdy. Halas edijiler gözleg-halas ediş çäreleriniň çäginde weýrançylyklaryň aşagyndan adamlary gözleýärler we harabalyklary arassalaýarlar.
Harasat çarşenbe güni başlap, penşenbe gijesine çenli dowam etdi. Pakistanyň meteorologiýa gullugynyň maglumatyna görä, şemalyň tizligi sagatda 90 kilometre ýetdi. Şäher häkimiýeti ýaşaýjylary öýlerinde galmaga we zerurlyk bolmasa daşary çykmazlyga çagyrdy.
Karaçi — 20 million ilaty bolan, ýurduň iň uly şäheridir.
