Hytaýyň Sian şäheriniň ýaşaýjysy Çžao Çen ömründe birinji gezek ýeke özi ýola çykýan gaýynenesine kömek etmegiň täsin usulyny oýlap tapdy.
60-dan geçen zenan sowatsyzlygynyň üstüne, Hytaýda iň giň ýaýran gepleşik dili bolan mandarin dilinde hem gepläp bilmeýärdi. Howaýollary kompaniýasynda ýörite ugrukdyryjy hyzmatynyň ýokdugy sebäpli, Çžao Çen bu meseläni özi çözmegi ýüregine düwýär we gaýnenesiniň ýoltorbasyna uçuş maglumatlary, ýagdaýyň düşündirişi we zerur wagtynda kömek bermek sorap ýazylan uly haty ýelmeýär.
Ol hatynda «Eger ony görseňiz, haýyş edýärin, kömek ediň we özüňizi Çžao Çeniň dosty hökmünde tanyşdyryň. Çaparyň telefon belgisi onuň jübüsindedir. Gyssagly ýagdaý ýüze çykanda, ýanyndaky gyzyl kartyň üstündäki QR-kody skanirlemegiňizi towakga edýärin» diýip ýazýar.
Soňra ýgit bu barada sosial ulgamlarda habar ýerleşdirýär we ol bary-ýogy iki sagadyň içinde bir milliondan gowrak adam tarapyndan okalýar. Netijede şol uçuş bilen ugraýan 21 ýaşly Leý atly talyp bu zenana kömek etmäge taýýardygyny bildirýär. Talyp uçuş wagtynda zenanyň gowuşgynsyzlyk tapan pursady oňa ýardam berýär we uçuşdan soň ony garaşyp duran ogluna elin gowşurýar. Ol hyzmat aňyrda dursun, hatda taksi üçin hödürlenen puldan hem ýüz öwürýär.
Aslynda Çžao Çen 11 ýyl bäri garry adamlara kömek edýän meýletinçi hökmünde tanalýar. Gyzyl kart we QR-kod baradaky pikir hem oňa degişli. Ol köçede garrylara kömek etmäge çykanda, özi hem şeýle karty ýany bilen göterýär.
