Google kompaniýasy Android ulgamly smartfonlaryň öndürijiligini ýokarlandyrmaga we batareýasynyň işleýiş wagtyny uzaltmaga gönükdirilen düýpli kämilleşdiriş işlerini geçirýär. Munuň üçin Android LLVM toolchain platformasyny we Automatic Feedback-Directed Optimization (AutoFDO) tehnologiýasyny ulanmak meýilleşdirilýär.
Android smartfonlary hemişelik usulda köp sanly fon amallaryny ýerine ýetirýärler, bu bolsa prosessoryň uly güýjüni talap edýär. AutoFDO tehnologiýasy programma kodunyň nähili ýerine ýetirilýändigini seljerýär we bu maglumatlary kompilýatora berýär. Bu bolsa ulgama programmalaryň iň köp ulanylýan ýollaryny saýlamaga we prosessoryň agramyny azaltmaga kömek edýär.
«Programma üpjünçiliginiň standart toplumynda kompilýator müňlerçe ownuk çözgütleri kabul edýär... AutoFDO kompilýatory dolandyrmak üçin kody ýerine ýetirmegiň real ssenarilerini ulanmak arkaly bu ýagdaýy üýtgedýär» diýlip, Google-yň habarynda bellenilýär.
Seljerme işleri üçin synag agramlyklaryndan, mysal üçin, 100 sany meşhur goşundynyň işledilmeginden alnan maglumatlar ulanylýar. Ýadro täzeden ýygnalandan soň, ulgam programmalaryň işini has netijeli optimallaşdyryp bilýär.
Google-yň deslapky synaglaryna görä, operasion ulgamyň ýükleniş wagty 2,1% gysgaldy, programmalaryň «sowuk» tertipde işe düşmegi bolsa 4,3% çaltlandy. Bu tehnologiýa Android ýadrosynyň iň soňky wersiýalarynda peýda bolar.
