Omoway kompaniýasy öz-özüni deňagramlylykda saklaýan ulgam bilen enjamlaşdyrylan OMO X elektrikli motosikliň köpçülikleýin önümçiligine başlandygyny yglan etdi. Bu baradaky resmi habar Singapurda geçirilen giňişleýin tanyşdyryş dabarasynda mälim edildi.
OMO X-iň esasy aýratynlygy — hiç hili kömeksiz öz deňagramlylygyny durnukly saklap bilmegidir. Bu mümkinçilik aerokosmos derejesindäki giroskoplary we emeli aň algoritmlerini birleşdirýän täze OMO-ROBOT binýady arkaly amala aşyryldy. Bu ulgam motosikliň ýagdaýyny yzygiderli seljerip, ähli hereketleri awtomat usulda dolandyrýar.
Tehnologiýanyň özeninde durýan güýçli giroskop (CMG) motosikleti iň pes tizlikde ýa-da doly saklanan pursatynda hem dik saklamaga ukyplydyr. Bu bolsa iki tekerli ulaglarda iň köp duş gelýän kynçylyk bolan deňagramlylygy ýitirmek we ýykylmak howpuny aradan aýyrýar.
Motosikletiň akylly elektronikasy ýoldaky ýagdaýy hem doly gözegçilikde saklaýar. Ol tekerleriň ýol bilen galtaşygyny barlaýar, taýmak ähtimallygyny peseldýär, çylşyrymly öwrümlerde sürüjä kömek edýär we bökdençliklere bada-bat garşylyk görkezýär.
OMO X özbaşdak duralga-da geçip bilýär. Sürüjä bolsa ony ýanyna çagyrmak üçin ykjam telefony ulanmak ýeterlik.
Akylly motosikl ilki Indoneziýa bazaryna çykarylar. Bu ýerde öňünden sargytlar 2026-njy ýylyň aprel aýynyň ahyrynda açylar, resmi satuwlar bolsa maý aýynda başlar. Ulagyň bahasy we doly tehniki häsiýetnamalary satuwa az wagt galanda aýan ediler.
