Ford kompaniýasynyň Ýewropa bölümi Explorer elektrik krossoweriniň täzelenendigini mälim etdi. Döwrebaplaşdyrmadan soň, awtoulag täze batareýa, artdyrylan ýol aralygyna we goşmaça funksiýalara eýe boldy. Ýewropa ýurtlarynda bu model üçin sargytlar eýýäm kabul edilip başlandy.
Explorer-iň binýatlyk (baza) wersiýasynda indi göwrümi 58 kWt·sag bolan litiý-demir-fosfat batareýasy ulanylýar. Bu batareýa bilen awtoulag 444 kilometre çenli ýol geçip bilýär. Mundan ozal bu görkeziji 378 kilometre deňdi.
Binýatlyk wersiýanyň hereketlendirijisiniň güýji takmynan 20 at güýji artdy we indi 190 at güýjüne, aýlaw pursady bolsa 350 Nm-e ýetýär. Ulagyň 0-dan 100 km/s tizlige ýetmek wagty 8,7 sekuntdan 8,0 sekunda çenli gysgaldy.
Krossower, şeýle-de, mediasistemasynyň täzelenen programma üpjünçiligini we batareýa daşarky elektrik enjamlaryny birikdirmäge mümkinçilik berýän Pro Power Onboard funksiýasyny aldy. Sürüjä kömekçi ulgamlar toplumy hem giňeldildi: awtomatiki parkowka, sürüjiniň ünsüni gözegçilikde saklaýan ulgam goşuldy, adaptiw kruiz-kontrol bolsa indi swetoforyň yşyklaryny seljerip bilýär.
Ýewropada Explorer-iň 340 at güýjüne çenli we bir zarýad bilen 602 kilometre çenli ýol geçýän wersiýalary hem elýeterlidir.
Modeliň bahasy 39,9 müňden 56,9 müň ýewra çenli aralykdadyr.
