Infiniti kompaniýasy täze nesil QX80 modeliniň hataryny has güýçli we çalt modifikasiýalar bilen giňeltmekçi bolýar. Bu barada brendiň önümler boýunça direktory Braýan Maranýo «Automotive News» neşirine habar berdi.
Neşiriň maglumatyna görä, kompaniýa bu modeliň azyndan iki sany täze wersiýasyny taýýarlaýar. Birinji modifikasiýa, ähtimal, Red Sport adyny alar we geljek ýylyň ýazynda bazara çykar. Onuň esasy tapawudy has güýçli hereketlendiriji bolar: 3,5 litrlik turbonadduwly V6 hereketlendirijiniň güýjüni 450-den 600 at güýjüne çenli artdyrmak meýilleşdirilýär. Daşky görnüşindäki üýtgeşmeler ujypsyz bolar. Olaryň arasynda has uly teker diskleri, gyzyl tormoz supportlary we karbondan ýasalan bezeg elementleri agzalýar. ABŞ-nyň bazarynda şeýle awtoulag Cadillac Escalade-V bilen bäsleşip biler.
Soňrak Infiniti Track Spec konseptiniň esasynda has radikal wersiýany çykarmagy göz öňünde tutýar. Bu modelde asma (podweska) üçin ýörite sazlamalar, peseldilen klirens we agras aerodinamik gurluşlar (obwes) bolar. Geçen ýylky konsept adaty hereketlendirijiniň 650 at güýçli wersiýasy bilen enjamlaşdyrylypdy. Başga bir çaklama görä, güýç beriji gurluş SEMA sergisinde görkezilen QX80 R-Spec prototipiniň esasynda döredilip biler. Ol awtoulag GT-R modelinden alnan we güýji takmynan 1000 at güýjüne deň bolan 3,8 litrlik motor bilen enjamlaşdyrylypdy, emma şeýle uly güýjüň seriýalaýyn wersiýa üçin niýetlenilmegi kyn hasaplanýar.
Mundan ozal Infiniti-niň wekilleri birnäçe täze modelleri çykarmak meýilnamalaryny hem tassyklapdylar. Olaryň arasynda benzinli V6 hereketlendirijili, mehaniki geçirijiler gutusy we yzky çekiji ulgamly sport sedany hem bar.
