Angliýanyň premier-ligasy Londonyň “Çelsi” klubuna 2011-2018-nji ýyllar aralygynda, klub Roman Abramowiçiň eýeçiliginde bolan döwründe goýberilen maliýe düzgün bozulmalary üçin 10,75 million funt sterling (takmynan 14,3 million dollar) jerime saldy.
Jerimeden başga-da, kluba indiki dokuz aýyň dowamynda akademiýa transferlerini amala aşyrmak gadagan edildi.
Esasy topara bir ýyl şertli transfer gadagançylygy hem girizildi. Bu karar boýunça synag möhleti iki ýyl.
Derňew 2022-nji ýylda başlandy. “Çelsiniň” täze ýolbaşçylary şol döwürde oýunçylara, hasaba alynmadyk agentlere we beýlekilere gizlin tölegleriň geçirilendigini liga özbaşdak habar berdiler.
Britaniýanyň metbugatynyň habarlaryna görä, düzgün bozmalar London klubynyň Eden Azar, Willian we Samýuel Eto'O ýaly futbol ýyldyzlaryny satyn almagy bilen baglanyşykly şertnamalar sebäpli bolmagy mümkin.
Resmi beýanatda ýeňilleşdiriji ýagdaýlaryň klubyň düzgün bozmalar barada meýletin habar bermegini, täze ýolbaşçylaryň bu faktlary boýun almagyny we derňewiň dowamynda liga bilen hyzmatdaşlygy öz içine alýandygy bellendi.
Şuňa meňzeş düzgün bozulmalar boýunça FA-nyň aýratyn tertip-düzgün derňewi dowam edýär.
