Halkara awtoulag federasiýasy (FIA) we Formula-1-iň ýolbaşçylygy Bahreýnde we Saud Arabystanynda Gran-priniň ýaryşlaryny ýatyrdy. Bu barada FIA-nyň resmi web sahypasynda yglan edildi.
Aprel aýynda geçiriljek ýaryşlar Ýakyn Gündogardaky häzirki geosyýasy ýagdaý sebäpli geçirilmez. "Birnäçe alternatiwa göz öňünde tutulan hem bolsa, ahyrky netijede aprel aýynda başga ýerde geçirilmejekdigi baradaky karara gelindi" - diýlip, beýanatda aýdylýar.
FIA-nyň prezidenti Mohammed Ben Sulayem bu ýurtlaryň ýaryş möwsümi üçin möhümdigini nygtady we şertler mümkinçilik berse, tiz wagtda gaýdyp geljekdigine umyt bildirdi.
“Bu karara gelmek kyn düşen hem bolsa, gynansak-da, Ýakyn Gündogardaky şu wagtky ýagdaýy göz öňünde tutsak, häzirki tapgyrda bu dogry karardyr” diýip, Formula One Group-yň prezidenti we baş direktory Stefano Domenikali aýtdy.
Bahreýniň Gran-prisi 10-12-nji aprelde, Saud Arabystanyndaky tapgyry bolsa 17-19-njy aprelde geçirilmelidi. Netijede çempionatda bäş hepdelik arakesme emele geler: 29-njy martda Ýaponiýadaky ýaryşdan soň, indiki tapgyr baryp-ha 3-nji maýda Maýamide geçiriler.
