Mazda kompaniýasy Ferrari-niň özüniňki bilen adybir elektromobilini çykarmak meýilnamasyny yglan edeninden bary-ýogy bir aý soň, «Luce» haryt nyşanyny hasaba aldyrmak üçin arza berdi. Bu barada Awstraliýanyň «Carexpert» neşiri habar berdi.
Mazda özüniň premial Luce sedanyny 1991-nji ýyla çenli öndüripdi. Modeliň önümçiliginiň bes edilendigine garamazdan, kompaniýa bu ady italýan awtoöndürijisine bermäge taýýar däl. Eger arza kabul edilse, Ferrari öz elektromobilini «Luce» ady bilen satyp bilmez we başga at saýlamaly bolar.
Ferrari özüniň ilkinji doly elektromobilini fewral aýynda tanyşdyrypdy we oňa italýan dilinde «ýagtylyk» diýmekligi aňladýan Luce adyny tassyklapdy. Apple-iň öňki dizaýneri Joni Aýwyň «LoveFrom» studiýasynyň gatnaşmagynda dizaýny döredilýän bu modeliň doly tanyşdyrylyşy maý aýyna meýilleşdirilýär.
Mazda-nyň arzasy 2026-njy ýylyň mart aýynyň başynda patentler bazasynda peýda boldy we bir hepdeden soň çap edildi. Haryt nyşanynyň 12-nji klas boýunça hasaba alynmagy, kompaniýa bu ady awtoulaglar üçin berkitmäge we beýleki öndürijileriň ony ulanmagyny çäklendirmäge mümkinçilik berer.
Mazda-nyň «Luce» modelini täzeden dikeltmek meýilnamasynyň bardygy ýa-da ýokdugy häzirlikçe näbellidir. 2017-nji ýylda kompaniýa täze Mazda6-nyň deslapky wersiýasy hökmünde seredilýän «Vision Coupe» konseptiniň tanyşdyrylyşynda 1969-njy ýylyň «Luce Rotary Coupe» modelini ýatlapdy.
Käwagt awtoöndürijiler modelleriniň adyny üýtgetmeli bolýarlar. Mysal üçin, 2024-nji ýylda Alfa Romeo özüniň «Milano» krossowerini hödürläpdi, emma awtoulagyň Italiýada däl-de, Polşada öndüriljekdigi sebäpli, modeliň ady «Junior» diýlip üýtgeldi.
