«Arzan bahaly MacBook Neo noutbugynyň peýda bolmagy tutuş şahsy kompýuter (PK) bazary üçin hakyky sarsgyn boldy. Bu barada Asus kompaniýasynyň maliýe direktory Nik Wu giňişleýin belleýär» diýip, PCMag neşiri ýazýar.
Top-menejeriň aýtmagyna görä, beýle elýeterli modeliň çykmagy pudak üçin garaşylmadyk ýagdaý boldy. Sebäbi ozal Apple öz kompýuterlerini diňe premium segmentde hödürlemek ýörelgesine eýerýärdi. Häzirki wagtda bazaryň beýleki gatnaşyjylary täze enjam bilen bäsleşmegiň dürli ýollaryny oýlap-ölçerýärler. Bu çekişmelere Microsoft, Intel we AMD ýaly ägirt uly kompaniýalar hem goşuldy.
Asus-yň wekilleriniň pikiriçe, Windows platformasyndaky noutbuk öndürijiler MacBook Neo-ny örän çynlakaý garşydaş hökmünde kabul edýärler. Hatda ýakyn wagtda dürli kompaniýalaryň bu modele gönüden-göni bäsdeşlik edip biljek täze enjamlary çykaryp başlamagyna-da garaşmak bolar.
Apple bu täze önümini 4-nji martda tanyşdyrdy. Noutbuk esasan berk we döwrebap metal gurluşly korpusy, iPhone 16 Pro-da hem ulanylýan kuwwatly A18 Pro çip prosessory hem-de giň okyjylar köpçüligi we gündelik ulanyjylar üçin niýetlenendigi bilen tapawutlanýar.
Başlangyç bahasy 599 dollara deň bolan MacBook Neo-nyň satuwlary 11-nji martda başlandy.
