Toyota kompaniýasy GR Yaris hetçbegi üçin täze rul döretdi. 2026-njy ýylyň modeli üçin girizilen bu üýtgeşmeler ruly tutmagyň oňaýsyzlygyndan şikaýat eden sürüjileriň seslenmelerine jogap hökmünde amala aşyryldy.
Öňki ruluň oňaýsyzlygy dolandyryş düwmeleriniň ýerleşişi bilen baglanyşyklydyr. Olar ruluň gyrasyna örän ýakyn ýerleşendigi sebäpli, sürüjiler awtomobili işjeň dolandyrýan wagty olary tötänleýin basyp bilýärdi. Inženerler professional ýaryşa gatnaşyjylaryň maslahatlaryna eýerip, düýbünden täze ruly işläp düzmek bilen bu meseläni çözdi.
Täze rul palçykdan ýasalan prototipleri ulanmak bilen ýaryş ýodalarynda synagdan geçirildi. Netijede, düwmeler howpsuzlyk ýassygy modulynyň töweregine — ruluň merkezine has ýakyn ýerleşdirildi. Mundan başga-da, ruluň tutulýan ýeri giňeldildi, diametri bolsa öwrümlere has çalt reaksiýany üpjün etmek üçin biraz kiçeldildi.
Şeýle-de, dizaýn üýtgedildi: Toyota logotipiniň deregine indi GR subbrendiniň nyşany goýuldy. Iki tarapdaky täze dolandyryş elementleri yşyklandyrylan halkalara eýe boldy. Şol bir wagtyň özünde, ruluň gyzdyryjy ulgamyny dik ýerleşýän el tormozy bilen bilelikde sargyt edip bolýar.
Toyota GR Yaris üçin täzelenmeler munuň bilen çäklenmeýär. Awtomobil rezin düzümi, protektor şekili we içerki gurluşy üýtgedilen täze Bridgestone Potenza Race tekerlerine eýe boldy. Öndürijiniň nygtamagyna görä, olar adaty ýollarda has sessiz bolup, ýokary tizlikli sürüşde ýola has gowy «ýapyşýar».
Şeýle hem amortizatorlaryň sazlamalaryna täzeden seredildi we rul dolandyryşynyň elektrik güýçlendiriji ulgamy täzelendi.
