Italiýa döwleti XVII asyryň meşhur suratkeşi Karawajonyň (Mikelanjelo Merizi) galamyndan çykan «Monsinýor Maffeo Barberininiň portreti» atly eserini 30 million ýewro satyn aldy. Takmynan 1598-nji ýylda çekilen bu polotno, hünärmenleriň pikiriçe, ýurduň aýry-aýry sungat eserine eden iň uly maýa goýumlarynyň biri boldy.
Eserde şol wagtlar Apostol palatasynyň ruhany bölüminiň işgäri bolup hyzmat edýän 30 ýaşlaryndaky Maffeo Barberi şekillendirilipdir. Soňra ol 1623-nji ýylda tagta çykyp, Rim papasy Urban VIII boldy. Bu pontifik taryhda sungatyň we barokko arhitekturasynyň uly hemaýatkäri hökmünde tanalýar.
Bir wagtlar bu eseriň hakykatdan hem Karawajo degişlidigi uly jedelleri döredipdi. Emma 1963-nji ýylda sungat öwreniji Roberto Longiniň «Karawajonyň hakyky «Maffeo Barberinisi»» atly makalasy çap edilenden soň, hünärmenleriň köpüsi eseriň asyl nusgadygyny ykrar etdiler.
Italiýanyň medeniýet ministri Alessandro Juli:«Bu eser aýratyn möhüm ähmiýete eýedir. Hut şu surat nakgaşyň döredijiliginiň häzirki zaman dünýäsinde täzeden öwrenilmeginde düýpli orun tutdy» diýip, eseriň ähmiýetli tarapy hakynda nygtady.
Döwlet suraty hususy kolleksiýadan satyn almak üçin bir ýyldan gowrak wagtyň dowamynda ýörite gepleşikleri geçirdi. Indi bu portret Karawajonyň beýleki şedewrleri, şol sanda 1971-nji ýylda satyn alnan meşhur «Ýudif we Olofern» eseriniň ýanynda ornaşyp, Rimiň «Palasso Barberini» muzeýindäki hemişelik gymmatlyga öwrüler.
