Art Basel we UBS tarapyndan hödürlenen täze hasabata görä, 2025-nji ýylda dünýäde sungat predmetleriniň satuw möçberi 4% ýokarlanyp, 59,6 milliard dollara ýetdi. Bu bolsa satuwlaryň iki ýyllap pese gaçmagyndan soň, bazaryň aram ýagdaýda dikelendiginiň alamatydyr.
Hasabatda bellenilişi ýaly, köpçülikleýin auksionlarda sungat predmetleriniň satuwy 9% ýokarlanyp, 20,7 milliard dollara, dilerlik pudagynda bolsa 2% ýokarlanyp, 34,8 milliard dollara ýetdi.
Global satuwlaryň 76%-i ABŞ-nyň, Beýik Britaniýanyň we Hytaýyň paýyna düşdi. Şol bir wagtyň özünde, ABŞ öňdebaryjy global sungat bazary hökmünde ornuny saklap galdy, dünýä satuwynyň 44%-i bu ýurduň paýyna düşdi. Bu bir ýyl ozalkydan 1% köpdür.
Beýik Britaniýa 18% paý bilen ikinji orny eýeleýär, Hytaý bolsa 14% bilen üçünji orunda galdy.
2025-nji ýylda onlaýn satuwlaryň möçberi 9,2 milliard dollar bolup, 2019-njy ýyldan bäri iň pes derejä düşdi. Dilerler sanly ulgamlar arkaly amala aşyrylýan satuwlaryň paýynyň hem ep-esli azalandygyny belleýär.
Umuman, sanly söwdalaryň paýy ýyllyk hasabynda 3% peselip, sungat bazarynda umumy satuwyň 15%-ine deň boldy. Bu görkeziji 2020-nji ýyldaky 25%-lik iň ýokary derejeden 10% pes bolsa-da, 2019-njy ýyldaky pandemiýadan öňki 9%-lik derejeden ýokary bolmagynda galýar diýlip, hasabatda bellenilýär.
