Angliýanyň Banky täze nesil banknotlaryň dizaýnyny üýtgetmegi we taryhy şahsyýetleriň, şol sanda Uinston Çerçilliň şekillerinden ýüz öwürmegi meýilleşdirýär. Olaryň ýerine kagyz pullarda Beýik Britaniýanyň ýabany tebigatynyň wekilleri peýda bolup biler. «Bloomberg» neşiriniň maglumatlaryna görä, häzirki wagtda kirpiler we torsuklar ýaly haýwanlaryň şekillerine seredilýär.
Şeýle çözgüt 44 müň töweregi adamyň gatnaşmagynda geçirilen jemgyýetçilik maslahatlaşmalaryndan soň kabul edildi. Angliýanyň Bankynyň maglumatyna görä, tebigat mowzugy bezeg üçin hödürlenen teklipleriň arasynda iň meşhury boldy. Taryhy şahsyýetler bolsa üçünji orny eýeledi.
«Tebigat — banknotlaryň hakykylygyny anyklamak nukdaýnazaryndan örän gowy saýlama bolup, bu biziň indiki tapgyrda Beýik Britaniýanyň ýabany tebigatynyň baý hem-de giň köpdürlüligini görkezip biljekdigimizi aňladýar» – diýip, Angliýanyň Bankynyň baş kassiri Wiktoriýa Kleland belledi.
Agentlik dizaýnyň üýtgemeginiň britan banknotlarynyň ösüşiniň nobatdaky tapgyry boljakdygyny nygtaýar. Soňky ýyllarda düzgünleşdiriji edara kagyz pullary galp ýasamak has kyn bolan polimer pullar bilen çalşyrypdy.
Ýeri gelende bellesek, Beýik Britaniýada nagt pullaryň ulanylyşy ep-esli derejede azaldy: eger 2014-nji ýylda ähli tölegleriň, takmynan, 48 göterimi nagt pullarda amala aşyrylan bolsa, 2024-nji ýyla çenli bu görkeziji, takmynan, 9 göterime düşdi.
