BMW Korea kompaniýasy flagman X7 krossoweriniň iki sany çäkli neşir görnüşiniň çykarylandygyny yglan etdi. Satuwlar diňe BMW Shop Online arkaly amala aşyrylar we söwda 10-njy martda başlanar.
Birinji wersiýasy - BMW X7 M60i xDrive M Sport Pro Marina Bay Blue Edition. Awtoulag M Marina Bay Blue Metallic reňkine boýalan. Ol BMW Kidney Iconic Glow yşyklandyryşly gara radiator gözenegini we garaňky elementli uýgunlaşýan LED faralary aldy.
Awtoulag 22 dýuýmlyk tekerler we uglerod süýümli aýna korpuslary bilen üpjün edilen.
Salon Tartufo reňkli BMW Individual Merino derisi, uglerod süýümli bezeg bilen üpjün edilen. Enjamlaryna Sky Lounge panoramaly üçegi, Bowers & Wilkins Diamond ses ulgamy we bäş režimli howa gözegçiligi girýär. Krossowerde ýedi oturgyç bar.
Kapotyň aşagynda 530 at güýjüni öndürýän V8 M TwinPower Turbo benzinli hereketlendirijisi ýerleşýär. Sagatda 100 km tizlige 4,7 sekuntda çykýar. Şeýle awtoulaglaryň ýedisini öndürmek meýilleşdirilýär.
Ikinji görnüşi - BMW X7 xDrive40d M Sport Pro Dravit Grey Edition. Ol Dravit Grey Metallic reňkinde bolup , şol bir M Sport Pro toplumy bilen üpjün edilen.
Bu modifikasiýa 340 at güýjüne eýe bolan, alty silindrli dizel hereketlendirijisi we 48 woltlyk ýeňil gibrid ulgamy bilen üpjün edilen. Ol sagatda 100 km tizlige 5,9 sekuntda çykýar. Ulagdan diňe 15 sanysy öndüriler.
