«Smart Pikachu» lakamly meşhur insaýder geljekki flagman smartfony bolan Xiaomi 18 Ultra barada ilkinji maglumatlary paýlaşdy. Onuň aýtmagyna görä, kompaniýa bu täze enjamy şu ýylyň ahyrynda, takmynan dekabr aýynda Hytaýda tanyşdyrmagy meýilleşdirýär.
Geçen gezekki Xiaomi 17 Ultra modeli tanyşdyrylanda hem edil şeýle wagt tertibi ulanylypdy. Ondan öňki «Ultra» seriýalary bolsa, adatça ýylyň başynda satuwa çykarylýardy.
Bu modelde iň uly täzelikleriň biri kamera ulgamynda bolar diýlip garaşylýar. Çeşmeden çen tutsaň, Xiaomi häzirki wagtda dört kameradan ybarat bolan ulgamy synagdan geçirýär. Ýadyňyzda bolsa, Xiaomi 17 Ultra modelinde kompaniýa adaty dört kameraly gurluşdan dänip, mehaniki zumly üýtgeşik ulgamy ulanypdy.
Eger täze maglumatlar tassyklansa, Xiaomi 18 Ultra-da ýene-de goşmaça modulyň peýda bolmagy mümkin we bu surata düşürme aralygyny has-da giňelder. Smartfonyň tehniki häsiýetnamalarynyň arasynda 200 megapiksellik periskop moduly we 50 megapiksellik ultra giň burçly kamera aýratyn agzalýar. Mundan başga-da, enjamyň täze nesil Snapdragon çipi we has uly göwrümli akkumulýator bilen üpjün edilmegine garaşylýar.
«Smart Pikachu» öň hem Xiaomi 13 Ultra smartfony we Xiaomi Pad 6 planşeti barada takyk maglumatlary berip, özüni ygtybarly çeşme hökmünde tanatmagy başarypdy. Täze model barada has takyk maglumatlaryň ýakyn aýlarda peýda bolmagyna garaşylýar.
